ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបញ្ជាក់ថា ការតាំងបង្ហាញសិល្បះវប្បធម៌ខ្មែរជារឿងល្អ តែវាជាគ្រោះថ្នាក់ប្រសិនជាការតាំងបង្ហាញនោះមិនគោរពនូវទម្រង់ដើមនៃសិល្បះ។

ថ្លែងក្នុងសារសំឡេងពិសេសនាព្រឹកថ្ងៃទី៨ ខែមីនា ឆ្នាំ២០២៣នេះ សម្ដេចតេជោ ហ៊ុន សែន បានប្រាប់ទៅឱ្យលោកស្រី ទ្រី ដាណា ឱ្យគោរពនូវការសម្រេចរបស់ក្រសួងវប្បធម៌ និងសហការជាមួយក្រសួងដើម្បីដំណើរការការបង្ហាញនូវការស្លៀកពាក់បែបប្រពៃណីខ្មែរឱ្យត្រូវតាមទម្រង់ដើម។

សម្ដេចបន្ថែមថា៖ «ការតាំងវាជាការល្អដើម្បីផ្សព្វផ្សាយនូវវប្បធម៌ខ្មែរក៏ប៉ុន្ដែប្រសិនជាការតាំងណាមួយខុសនូវទម្រង់វាស្មើនឹងការបំផ្លាញនូវវប្បធម៌ខ្មែរទៅវិញ។ ដូច្នេះមិនតាំងវាល្អជាងតាំង! សូមឱ្យលោកស្រី ទ្រី ដាណា សហការឱ្យបានហ្មត់ចត់ជាមួយក្រសួងវប្បធម៌និងវិចិត្រសិល្បះហើយបើសិនជាមានតម្រូវការសុំស្នើឱ្យក្រសួងវប្បធម៌បញ្ជូនអ្នកបច្ចេកទេសឱ្យពិនិត្យមើលក្នុងទីតាំងនោះតែងម្ដង»។

នៅប៉ុន្មានថ្ងៃមកនេះមានជម្លោះរវាងអ្នកជំនួញខ្មែរម្នាក់គឺ លោកស្រី ទ្រី ដាណា ដែលបានចោទក្រសួងវប្បធម៌ថាបានបង្កការលំបាកដល់លោកស្រីក្នុងការរៀបចំការបង្ហាញនូវសំលៀកបំពាក់ប្រពៃណីខ្មែរនៅតំបន់អង្គរ និងថាលោកស្រីឈប់ចង់បន្តការងារទៀតហើយផងដែរ ខណៈក្រសួងវប្បធម៌បានលើកឡើងថា ខ្លួនមិនបង្ករការលំបាកនោះទេគ្រាន់តែឱ្យលោកស្រី ទ្រី ដាណា រៀបចំអ្វីដែលចង់បង្ហាញនេះឱ្យបានត្រឹមត្រូវតាមទម្រង់ដើមប៉ុណ្ណោះ៕